Newyddion

Mawrth 12 2009

WALIAU SYCH

Byddwn yn cynnal cyfres o ddyddiau hyfforddi i addysgu a datblygu sgiliau codi waliau sych.  Mi fydd y sesiynau yma yn cael eu cynnal yn Egryn ger Talybont  ar y dyddiau

canlynol :-

Dydd Mercher 8fed a Dydd Iau 9fed Ebrill 2009

Dydd Mercher 13eg a Dydd Iau 14eg Mai 2009

Dydd Mercher 10fed a Dydd Iau 11eg Mehefin 2009

Cost  am y ddau ddiwrnod £60. Dim ond 10 lle ar gael, felly i osgoi  siomedigaeth archebwch le nawr ar 01766 510129

Mawrth 9 2009

BLAS AR Y TYMHORAU YNG NGHRAFLWYN

Wyddoch chi o ble daeth y bwyd sydd ar eich plât?  Allwch chi fod yn siŵr o’i hanes?  Fel rhan o ymgyrch i annog pobl i brynu eu bwyd o ffynonellau lleol, bydd yr Ymddiriedolaeth Genedlaethol yn cynnal cyfres o weithdai coginio tymhorol yn ardal Gorllewin Eryri a Llŷn.  Fe gynhelir y cyntaf o’r rhain yn Neuadd Craflwyn, y tu allan i Feddgelert ar Fawrth 24.

Bydd Elwen Roberts o Hybu Cig Cymru’n coginio’n anturus gan ddefnyddio cynnyrch lleol i greu bwyd cyffrous ar gyfer y Gwanwyn.

Meddai Richard Neale, rheolwr eiddo’r Ymddiriedolaeth Genedlaethol yn yr ardal  ‘’Rydym yn hynod falch o fod yn gweithio gyda Hybu Cig Cymru ar y prosiect hwn.  Yn y cyfnod yma o argyfwng economaidd mae’n bwysig gallu dangos i bobl sut y gallant gefnogi eu heconomi leol.  Mae gan Elwen syniadau ardderchog i’w rhoi i chi felly rwy’n siŵr y bydd yn noson hwyliog i bawb.”’

Fe gynhelir gweithdai pellach drwy gydol y flwyddyn a byddant yn cynnwys bwydydd sy’n defnyddio cynhwysion sy’n lleol i ardaloedd arbennig fel y cig cranc llwyddiannus gan Aberdaron Seafoods.

Bydd y noson yn cychwyn am 7, mynediad yn £4.00 i gynnwys lluniaeth ysgafn a gwydraid o win.  Tocynnau ar gael o swyddfa’r eiddo ar 01766 510120.  Mae lleoedd yn gyfyngedig felly cofiwch fwcio’n gynnar.